如何挑選貓罐頭
上星期我哋講到貓係天生肉食性動物少飲水，要從食物中吸收身體所需嘅肉類蛋白質同水分。長期少飲水會影響貓貓腎臟嘅健康，有機會造成慢性腎衰竭、尿道炎、結石等問題。所以為咗令貓貓每日飲多啲水，好多貓友都會鍾意餵罐頭甚至喺罐頭或乾糧裡面加水。喺揀選貓罐頭時唔好剩係買貓貓鍾意食嘅口味，仲要睇埋罐頭嘅質地、營養成分、食材等。今個星期我哋會睇下點樣揀選優質嘅貓罐頭。
主食罐
即符合美國 AAFCO (美國飼養控制中心) 營養指標嘅貓罐頭，可以作為貓貓嘅主食。其成分通常係肉泥同內臟，接近貓貓祖先捕食習慣嘅食物。主食罐含豐富優質蛋白質、高肉量、高含水量 (含有 80% 的水分) 而且營養均衡亦較自家製鮮食方便。但相對地味道、口感同香味會較差，如果貓貓食開「重口味」乾糧，轉糧嘅過渡時間可能會長啲。
副食罐
簡單嚟講就係貓貓嘅點心同零食，口感會較重，可以加多啲水落去令貓貓飲多啲水。副食罐嘅營養成分唔足夠提供貓貓每日身體所需嘅營養，建議要配搭乾糧 / 主食罐進食以增加蛋白質同水分嘅攝取。要留意返副食罐口味較重，餵得太密可能會令貓貓「揀飲擇食」。
溫馨提示：
- 由於罐頭以真空密封方式隔絕細菌，無論係主食罐或者副食罐，開罐後接觸到空氣都會容易腐壞，因此要盡快食完同埋避免喺室溫下擺放超過一小時。開罐後必須冷藏或冷凍保存。
- 貓罐頭本身含水量較高，大家可以加少少水去增加貓貓飲水量，但建議唔好加太多，否則貓貓可能因為味道太淡而唔食，或者水太多食唔到罐頭嘅肉而令貓貓比較容易餓。
- 購買時不妨留意下有無開罐後嘅食材相片。如果睇到魚肉呈現塊狀或片狀，表示係用魚身肉製作；如果魚肉係呈現泥狀 (幼貓罐頭除外)，則表示有添加魚頭同魚尾部份。
- 雖然吞拿魚味道較重容易吸引貓貓進食，但有累積重金屬嘅疑慮。建議唔好經常餵食純吞拿魚嘅罐頭，而係喺貓咪生病食慾不佳嘅時候用嚟增進食慾。
- 熱力會破壞食物中嘅營養，建議放喺室溫下解凍，唔好直接加熱水。
- 無論食乾糧或者罐頭都要勤力啲幫貓貓刷牙清除牙菌膜，保持口腔健康。
以上分享係一班養貓人士嘅衷心建議，我哋並唔係專業嘅營養師或獸醫，若大家對貓貓嘅健康問題有所疑問，請向專業嘅營養師或獸醫查詢。祝大家嘅貓貓食得健康！
參考資料
- 貓罐頭什麼牌子好？怎麼挑選貓罐頭？作者：貓貓 【童童寵物網】
- 貓糧選購技巧及有害成份 作者：寵物營養師蘇菁菁
- 【寵物飲食】罐頭篇－主食罐副食罐分析比較 作者：Q小蓉
- Tips for Choosing Cat Food
- 餵貓吃肉當主食概念
來源
此資訊由 PetNfans 寵物社交 App 提供。
