狗狗足部護理

狗狗嘅腳掌唔似得我哋人類有鞋同襪嘅保護，佢哋嘅肉墊就係與生俱來嘅「鞋仔」，唔好以為淨係會喺秋冬嘅時候，皮膚先會出現乾燥、「爆拆」、龜裂嘅問題呀，就算喺又熱又濕嘅夏天，我哋都好需要進行狗狗足部護理㗎！

每日我哋帶狗狗落街散步／跑步都會經過草地、滿佈沙石嘅路面，落雨之後仲可能會踩到「水氹」。行得多唔同嘅路面，久而久之佢哋嘅肉墊就會變得粗糙、龜裂。雖然佢哋嘅腳掌同腳趾甲比我哋人類嘅堅硬，但都有可能會俾路面上嘅玻璃、鋒利物件、砂石等割損。

萬一割損咗又無好好處理嘅話，任何污穢、細菌、化學劑、鹽、砂石等都可能會令佢哋嘅腳掌感染細菌、引致紅腫、發炎等問題。

要做好佢哋嘅腳掌護理就要留意以下三點：

散步後要立即洗腳或者用性質溫和嘅濕紙巾幫狗狗抺乾淨腳掌上嘅沙石同污穢。檢查腳趾之間嘅鏠隙，要特別留意狗狗露出嘅指甲部分，狗狗露出嘅指甲同鏠隙唔好好清潔，有可能會滋生細菌、真菌及霉菌。
用狗狗專用嘅腳掌護理產品。市面上有好多寵物護掌產品俾大家選擇，呢啲產品能夠幫助軟化狗狗腳掌上嘅硬皮、減少龜裂、消炎、抗菌等。使用方法好簡單，大家只要將狗狗腳掌按喺護掌膏上面，或者直接搽少少喺腳掌上面特別係容易龜裂、有硬皮嘅地方就得！
要留意狗狗有無經常舔或者咬自己腳趾。因為呢啲舉動好有可能係腳掌有傷口／發炎令狗狗覺得痕癢，所以見到有咁嘅情況一定要檢查吓呀！