關節保健品 - 葡萄糖胺

關節痛或者發炎呢啲關節問題並唔係只會喺年老嘅貓狗身上先會出現，好多時我哋都會聽到年輕嘅貓狗患有關節嘅問題。原因有遺傳性先天髖關節發育不全、年齡增長等。而過度跑跳、肥胖、長期跑樓梯等都會對貓狗嘅關節造成好大嘅傷害。

我哋除咗每日要帶佢哋做適量嘅運動、避免跑跳同控制體重之外，更要適當地幫佢哋補充葡萄糖胺以防關節出現問題。

葡萄糖胺 (Glucosamine)

葡萄糖胺 (Glucosamine) 係一種喺貓狗身體可以自行合成嘅物質，能維持軟骨及關節嘅健康，但隨著年紀嘅增長，合成嘅速度會愈來愈慢。所以適當嘅補充能改善關節退化同發炎，仲可以增加關節嘅緩衝能力，減少摩擦同疼痛。

下一個星期我哋會睇下同葡萄糖胺相輔相成發揮保護關節功效嘅軟骨素。

以上嘅分享係一班養貓狗人士嘅經驗心得，我哋並唔係專業嘅營養師或獸醫，若大家對貓狗嘅健康問題有所疑問，請向專業嘅營養師或獸醫查詢。祝大家貓狗食得健康！