關節保健品 - 軟骨素

葡萄糖胺 (Glucosamine) 同軟骨素 (Chondroitin) 都係貓狗身體可自行合成嘅物質，有助鞏固關節健康、紓緩關節痛楚及改善關節嘅靈活性。軟骨素大量集中喺關節嘅軟骨中，有助軟骨保留水分，增加潤滑度，令日常身體動作更加順暢，對紓緩關節痛楚同強化軟骨組織都好有幫助㗎！

但隨著貓狗身體嘅老化，葡萄糖胺同軟骨素合成嘅速度會逐漸趕唔上分解嘅速度，影響關節內細胞嘅新陳代謝，令到關節出現僵硬、發炎及疼痛難耐嘅症狀。

軟骨素已被證實可經由口服而達到補充關節軟組織結構嘅效果，同葡萄糖胺一起服用，對改善關節健康、紓解關節炎疼痛、延緩關節老化等問題更有相輔相成嘅作用。

骨關節炎

骨關節炎又叫做退化性關節炎，係由於軟骨出現磨損、厚度變薄而引致。貓狗患上骨關節炎嘅高危因素包括年齡、肥胖、關節不穩定、關節軟骨過度負荷、髖關節發育不良等。

唔同種類嘅貓狗，佢哋嘅理想體重都唔一樣，太肥或者太瘦都唔好㗎！想幫貓狗保養關節、延緩關節退化最有效嘅方式就係保持標準體重同良好嘅身材，減輕關節承受嘅壓力；每日俾佢哋適量嘅運動、均衡飲食、同埋補充返啲寵物用嘅葡萄糖胺同軟骨素嘅保健食品。

以上嘅分享係一班養貓狗人士嘅經驗心得，我哋並唔係專業嘅營養師或獸醫，若大家對貓狗嘅健康問題有所疑問，請向專業嘅營養師或獸醫查詢。祝大家嘅貓狗食得健康！