如何預防貓狗耳朵發炎

夏天，香港嘅天氣又熱又潮濕，細菌最容易滋生同繁殖。所以除咗要留意寵物嘅皮膚之外，保持寵物耳仔清潔都好重要㗎！

唔好以為貓貓咁鍾意乾淨或者「豎」耳品種嘅貓狗就唔洗清潔佢哋嘅耳仔呀！無論任何「摺耳」或者「豎耳」品種嘅貓狗都要定時定候「望下」、「聞下」、檢查下佢哋嘅耳仔，健康嘅耳仔會呈現淡粉紅色、無異味、乾淨、會有少少米黃色嘅耳油分泌都係好正常嘅。

如果你發現家中貓狗係咁搖頭、抓耳仔、耳仔有異味、發紅、有啡或者黑色好似蠟狀嘅耳垢、腫脹、有皮屑等，就有可能係感染耳蟎或者患上其他耳道疾病引致發炎，建議你盡快帶佢哋搵獸醫做個詳細檢查，及早對症下藥。

由於耳暪呢種寄生蟲嘅傳染性極高，假如你懷疑家中有貓狗染上，建議你盡快帶晒全屋所有毛孩去睇獸醫。

預防貓狗耳朵發炎：

幫貓狗「抆」或者修剪耳毛
定期幫貓狗「抆」或者修剪耳毛有助耳道通風、減低細菌滋生、防止耳毛積聚耳垢、減少耳道感染。
每星期幫貓狗清潔耳仔
市面上有好多寵物專用嘅耳仔清潔液，大家只要輕輕將貓狗抱住打側平放，將清潔液慢慢灌滿耳道，用手指輕輕按摩佢哋嘅耳根部位，約一分鐘等耳道入面嘅耳垢溶解，然後放手等佢哋自己「摔頭」將耳道入面嘅清潔液同耳垢摔出，再用棉花抺乾淨對耳仔就得啦！
每月定期使用預防跳蚤及牛蜱嘅滴劑或者牛蜱帶
每個月幫貓狗「滴頸」及使用牛蜱帶能有效預防跳蚤、耳暪同牛蜱呢啲有害嘅寄生蟲。不過唔同牌子嘅產品，會針對返唔同嘅害蟲，買果陣要問清楚啦！
保持耳仔乾爽
幫貓狗沖涼時，可以先將棉花球塞入佢哋嘅耳仔，防止沖涼水濺入。沖完涼後再用棉花清潔外耳同用風筒吹乾耳仔內外毛髮。

以上嘅分享係一班養貓狗人士嘅經驗心得，我哋並唔係專業嘅營養師或獸醫，若大家對貓狗嘅健康問題有所疑問，請向專業嘅營養師或獸醫查詢。祝大家嘅貓狗身體健康！