如何預防跳蚤和牛蜱

每年嘅 5 到 10 月都係蚊蟲孳生嘅旺季！好多時我哋都會聽到「落完雨唔好同狗狗去草地、公園玩！」、「夏天唔好同狗狗去行山，啲草叢有好多跳蚤、牛蜱！」等勸告。但成個夏天流流長又成日落雨，唔通我哋真係放假都唔好同狗狗出街玩？

跳蚤有「超級吸血鬼」之稱，狗狗俾佢咬到，除咗會令狗狗「周身痕」之外，主人都會㗎！跳蚤嘅繁殖速度好快，如果唔盡快殺滅就會愈生愈多，攪到「成屋都係」，分分鐘要用埋減蚤煙霧彈「炸屋」先殺得死！

另一個有「狗狗吸血殺手」之稱嘅牛蜱，同蚊、烏蠅一樣都係經常可以喺戶外發現嘅一種昆蟲，但牛蜱比蚊同烏蠅對狗狗嚟講恐怖得多，牛蜱會經由吸血將一啲血液寄生蟲如焦蟲 (Babesia) 同艾利希體 (Ehrlichia) 傳播俾狗狗，呢啲血液寄生蟲會令到狗狗短時間內出現貧血、嘔吐、肚痾、甚至唔食嘢等等症狀。萬一狗狗染上牛蜱熱又得唔到適當嘅治療、喺短時間內搵唔到合適血型嘅大型狗狗捐血嘅話，更會有生命危險！

當你發現狗狗身上有牛蜱時，千祈唔好就咁用手或者鉗夾走隻牛蜱！要用高濃度酒精棉花按實隻牛蜱「焗暈」佢，再用鉗貼住狗狗皮膚快速咁垂直夾起，記住千祈唔好「整爆佢」，牛蜱個肚入面有好多蟲卵，整爆咗啲卵出嚟無及時處理就會孵化成蟲，繼續寄居喺狗狗身上，形成一個惡性循環！雖然唔係隻隻牛蜱都帶有血液寄生蟲，但為咗你嘅寵物性命著想，萬一喺狗狗身上發現牛蜱甚至已經吸血吸到「漲卜卜」時要盡快帶去獸醫檢查，千祈唔好拖呀！

預防跳蚤同牛蜱最有效嘅方法係：每個月都要幫寵物滴頸；帶預防牛蜱頸帶；出街前用埋防蚤蝨噴霧等等。最重要嘅係每次去完草地或者公園玩，返屋企前記得要幫狗狗全身上下檢查清楚，特別係耳仔、下巴、腳掌、腳趾同肚皮呢啲位；跳蚤怕水，返到屋企記住幫狗狗沖返個靚涼啦！