防尿道膀胱炎 - 小紅莓

成年人每日飲八杯水能補充人體充足水分，有助降低尿液中嘅鈣濃度、防止結石產生、更有效將尿道內嘅細菌同毒素排出體外、加速新陳代謝等，可見水分喺我哋身體入面擔任咗好多重要嘅工作。

成年嘅貓每日飲水量建議為每公斤嘅體重 40c.c. 到 60c.c. 才有效減低泌尿道、腎臟、肝臟等方面嘅疾病，但貓天性唔鍾意飲水，咁我哋仲有無其他方法預防貓貓尿道發炎或者減低復發嘅機會呢？

小紅莓 (Cranberry)，又叫紅莓或者蔓越莓，含有豐富嘅維他命 A、C 同花青素 (Proanthocyanidins)，係一種超強嘅抗氧化劑，有效去除體內産生嘅自由基減慢衰老。小紅莓有特殊嘅馬尿酸成分，屬於天然嘅抗生素，可以將附喺尿道、陰道、膀胱等泌尿器官內壁嘅有害細菌同病毒隨著小便排出體外，減低患上尿道炎機會。

另外，小紅莓亦能抑制大腸桿菌嘅粘附能力，大腸桿菌係引起 80% - 90% 尿道感染 (UTI) 同牙周病嘅細菌。尿液過鹼或者過酸都會造成結石，進食小紅莓可以讓尿液回復到最佳 pH 值，防止結晶或結石喺膀胱同腎臟形成。

市面上有好多專為貓貓而設嘅小紅莓保健品同小食，利用科學技術萃取到小紅莓嘅營養成分，又能避免攝取過量糖分，大家不妨可以試試。

以上嘅分享係一班養貓貓人士嘅經驗心得，我哋並唔係專業嘅營養師或獸醫，若大家對貓貓嘅健康問題有所疑問，請向專業嘅營養師或獸醫查詢。祝大家嘅貓貓食得健康！