天然的植物驅蟲劑 - 苦楝油

夏天嚟啦，大家每日除咗要袋定把遮之外記得帶埋蚊怕水呀！

唔知大家有無 DIY 防蚊膏或者蚊怕水呢？除咗香茅驅蚊之外，苦楝油 (Neem Oil) 都係一個好好嘅選擇！苦楝油原料來自印度，顏色啡啡黑黑，聞落去有好大陣蒜頭洋蔥味，好多人聞過都怕怕呢！但研究指出，苦楝油可以防治 200 多種害蟲，無論蚊、蚤定係牛蜱都預防到㗎，仲係好多有機農場最常用嘅天然農藥，無毒而且對人畜無害。

咁貓貓狗狗用唔用得呢？苦楝油係一種極佳嘅天然植物驅蟲劑，可以用喺貓狗身上預防跳蚤、壁蝨、蚊蟲等等。苦楝油入面含有一種名為印楝素 (Azadirachtin) 嘅成分，有抗菌、抗微生物同抗黴菌嘅效果，成分安全天然。市面上有由苦楝油提煉嘅寵物蚊怕水或者沖涼液，其難聞嘅蒜頭味已經去走咗，每次出街噴一噴狗狗手腳同肚仔仲可以預防寄生蟲上身，返到屋企用埋苦楝油沖涼液沖涼就最安全喇！

唔講唔知，苦楝油仲含有豐富維他命 E、甘油脂同脂肪酸，對貓狗皮膚有天然嘅補濕、滋潤同埋再生功能。用含苦楝油成分嘅寵物沖涼液幫毛孩沖涼，除咗可以驅蚤之外，仲可以改善好多寵物嘅皮膚問題，無論係對細菌、黴菌定係病毒感染都有幫助。絕對係呵護寵物皮膚同埋沖涼浸 SPA 嘅好選擇。

以上分享係一班養貓狗人士嘅經驗心得，我哋並唔係專業嘅營養師或獸醫，若大家對貓狗嘅健康問題有所疑問，請向專業嘅營養師或獸醫查詢！